Diane Kruger

Þýska leikkonan Diane Kruger varð þekktust fyrir fjórum árum m.a. fyrir leik sinn í myndunum Troy og National Treasure. Hún reyndi fyrir sér sem fyrirsæta á unglingsárunum en svo kviknaði áhuginn á leiklist og hefur leiklistarferillinn stigið hátt uppá við síðan. Diane hefur einstaklega flottan og kvenlegan stíl og eru hún og kærastinn hennar, Joshua Jackson, talin ein af best klæddu pörunum í Hollywood í dag.

Diane er innblástur Chanel hönnuðarins Karl Lagerfeld og musið hans, en hún hefur nokkuð franskan stíl enda bjó hún í París og var gift frönskum manni. Hún klæðist mikið svörtu og hvítu, sem eru aðalsmerki Lagerfelds. Þegar hún klæðist aftur á móti litum, er það á mjög svo áberandi og eftirtektarverðan hátt. Hún notar skæra liti og heldur þá aukahlutunum lágstemmdum, þannig að liturinn stendur algjörlega uppúr.

Hún heldur fast í sinn stíl og breytir honum ekki of mikið milli árstíða. Hún sést aðallega í fallegum kjólum og fínni fatnaði, en gerir glamúr á annan hátt en margar aðrar stjörnur og tekur varla feilspor hvað klæðnað og samsetningar varðar. Hún gefur fallegum skóm og clutch töskum mikinn gaum og virðist oft hugsa vel um að aukahlutirnir harmoneri vel saman við restina. Hún heldur stíl sínum klassískum með nútímalegu tvisti.