Nauðsynjar í ferðatöskuna

Þegar pakkað er fyrir ferðalag, hvort sem áfangastaðurinn er framandi hitabeltiseyja, menningarleg stórborg eða ferð um dreymandi sveitahéruð, er grundvallaratriðið skipulagning. Það er margt sem þarf að hugsa um eins og hvert er farið, hve lengi, hvað á að gera og veðurfarið. Það segir sig sjálft að það krefst ólíks fatnaðars þegar farið er í tempraða stórborg heldur en á heita sólarströnd og því ekki úr vegi að hugsa vel um fatnaðinn áður en farið er, til að gera það auðveldara að klæða sig á áfangastaðnum. Ekki vill maður eyða dýrmætum tíma í að ákveða hverju á að klæðast.

Til að taka ekki of mikið með sér er alltaf best að setja saman alklæðnaði (e. outfits). Para saman einu pari af buxum við eins og tvo til þrjá efri parta. Passa að eitt par af skóm passi við fleiri en tvær flíkur og þar fram eftir götunum. Ef að maður hugsar allt í outfitum í stað stakra flíka er öruggt að útkoman verður betri. Minni höfuðverkur að ákveða hvað maður á að fara í og auðveldara að koma fleiru nýju sem maður kaupir á áfangastað í töskuna.

Þegar maður er erlendis getur maður oft fengið hugmyndir frá innfæddum og ef maður fær tendens til að klæða sig eins og þeir, þá er um að gera að fylgja tilfinningunum. Á framandi slóðum er tilvalið að prófa sig áfram, einnig verður skemmtilegra að ferðast í stíl við menningu landsins. En annars er sumt betra en annað þegar farið er til ákveðins áfangastaðs. Hér eru því nokkrar hugmyndir af ferðatöskum fyrir þrjár mismunandi ferðir.

Sólarströnd   Veður: Heitt
Á sólarströndum eru samspil þæginda og smartheita það mikilvægasta. Casual klæðnaður og svolítið ‘laid-back’. Ekki vera að hafa of mikið fyrir hlutunum, þar sem þetta er líklega langþráð frí, hvort sem það er með fjölskyldu eða vinum. Það sem verður að vera í ferðatöskunni eru sundföt til skiptanna, allavega nokkur bikiní eða flottir sundbolir. Bikiníin geta verið mismunandi, eins og eitt í svörtu, hvítu eða öðrum hlutlausum lit, annað í skærum lit og svo þriðja í einhverju flottu, exótísku munstri. Að mínu mati eru þrjú fín tala en fjöldinn fer náttúrulega eftir lengd frísins. Sumir fíla sundboli betur og sem betur fer eru þeir að koma mikið aftur og þá sérstaklega 50’s stílar sem ýta undir kvenlegan vöxt eins og mjaðmir og barm. Kaftan kjólar og aðrir léttir kjólar úr chiffon og öðrum hálfgegnsæjum efnum er ein flottasta leiðin til að hylja yfir sig við sundlaugarbakkann. Þetta er fullkominn tími og staður til að njóta þess að klæðast sterkum, áberandi litum og framandi munstrum – vera svolítið líflegur. Sandalar er það þriðja sem er alveg ómissandi, hvort sem það eru gladiator innblásnir sandalar eða einhverjir klassískari, og geta þeir verið í brúnu, svörtu og hvítu leðri og með allskyns ólum eða skrauti. Endilega setjið á ykkur helling af skarti, en gull fer einstaklega vel við brúna húð. Fallegir skartgripir geta einnig dregið athyglina af stöðum sem við viljum hana síst! Ef maður ætlar að skreppa í dagsferð eru flottar stuttbuxur, frekar stuttar og aðsniðnar við aðeins víðari sumarlegan topp algjörlega málið. Sandalarnir ganga svo við þetta alveg eins og bikiníið. Fyrir heit sumarkvöld ganga léttir kjólar vel, alls ekki of fínir en heldur ekki of casual (ekki fara í hálfgegnsæ cover-up út að borða). Nauðsynlegt er að hafa með sér gollur eða stuttan jakka yfir kjólinn ef hitinn fer að lækka. Annars tekur maður bara með kvölddress sem manni líður vel í og helst frekar plain kjól sem hægt er að breyta með aukahlutum. Það síðasta sem þarf svo að vera í töskunni eru sólgleraugun og flottir klútar.

Borgarferð   Veður: Kalt/Heitt
Misjöfn stemning er í mismunandi borgum og því þarf maður aðeins að finna út hver hún er. Einnig er fatnaður fyrir borgarferð mismunandi eftir tilgangi ferðarinnar, er þetta; menningarferð, verslunarferð, viðskiptaferð eða bara létt skoðunarferð um borgina. Í borgarferðum er maður þó oftast aðeins formal klæddari en á sólarströnd. Fyrir kalt veður er best að halda sig við basic fatnað eins og svartar og gráar fínni buxur við blússur, skyrtur og blazer jakka. Gollur, bæði svolítið víðar og passlegar eru alltaf góðar og tóna niður formlegheit. Annað í fínum prjónaefnum eru t.d. v-hálsmáls peysur í gráu, svörtu eða brúnu. Til að gera knit efnið áhugaverðara er flott að vera í silkibol innan undir í skærum lit og láta læðast undan peysunni. Gallabuxur er annað sem ætti einnig að vera með, fyrir þá sem þær fíla. Dökkar eru ákjósanlegastar, því þær eru klassískari og ganga við fleiri liti. Kápa er nauðsynleg, en alls ekki taka of síða eða þunga þar sem hún bæði þyngir töskuna og tekur dýrmætt pláss. Veljið frekar léttari kápu og klæðist þá þykkari peysu innan undir. Takið einnig með kjóla eða pils til að klæðast þegar farið er á veitingastaði og annað fínt, en þeir sem klæðast líka kjólum ‘ófínt’ taka náttúrulega fleiri til skiptana. Skart ætti að vera statement hlutir sem hægt er að nota við fleiri en eina flík í töskunni. Skótau ætti að vera eitthvað þægilegt sem gott er að ganga í. Fyrir heitari veður eru víðir sumarkjólar- og toppar í bland við þröng pils og stuttbuxur tilvalið. Sandalar og millifínir hælar er skótau sem ætti að vera með ásamt vel völdnu skarti og töskum.

Framandi ferðalag   Veður: Heittemprað
Í framandi ferðalögum veit maður aldrei við hverju má búast. Það getur því bæði verið erfitt, en skemmtilegt að pakka í tösku þegar áfangastaðurinn er framandi. Oft má búast við að ferðast mikið og skoða, hvort sem það er í rútum, lestum, bílum eða fótgangandi. Þannig er algjörlega nauðsynlegt að bæði fatnaður og skór séu þægileg. Best er að halda aukahlutum í sem minnstu magni, en þó taka með sér örugga kosti sem ganga við flestar aðrar flíkur, til að poppa klæðnaðinn upp. Það er ábyggilega betra að taka með sér ökklabuxur og stuttbuxur – í gallaefni eða öðru – í stað kjóla, þótt allavega einn þægilegur sumarkjóll ætti að vera með. Hlýrabolir í plain sniðum en flottum litum taka mjög lítið pláss en eru virkilega þægilegir að grípa í. Lítil vesti með einhverjum smáatriðum eru frábær til að klæðast yfir létta boli, þar sem þau gera lúkkið áhugaverðara. Töskur í stærra lagi eru einnig nauðsynlegar, svo allt komist nú fyrir; en passið samt að þær séu meðfærilegar, t.d. eru þær sem fara yfir aðra öxlina betri en þær sem þarf að halda á. Stráhattur toppar þetta svo allt saman, en hann er flott leið til að hylja sig fyrir sólinni auk sólgleraugna.

Að pakka
Hvernig er svo best að pakka í töskuna? Gott er að byrja á þyngstu hlutunum neðst og raða eftir þyngd, þannig léttur og viðkvæmur fatnaður sé efst. Þannig fara skórnir neðst og hvert par sett í poka til verndar. Taupokar eru ákjósanlegastir, en plastpokar eru í lagi. Til að halda löguninni er gott að fylla þá með sokkum, þunnum bolum eða öðru sem þú tekur með þér. Buxur koma næst og til að forðast of mörg brotför er best að brjóta þær saman til helminga. Næst fara svo bolir og kjólar og reynt er að brjóta þá sem minnst saman. Þunnum hlýrabolum má svo rúlla upp og setja í hliðarnar. Efst fer svo fatnaður sem er úr þunnum efnum eða hefur viðkvæmar tölur, pallíettur eða skraut. Gott er að snúa því sem hefur skraut á rönguna til að verja það. Virkilega fín föt er svo gott að setja í plastpoka eins og fást hjá efnalaugum (eða kaupa veglegri poka sem fást t.d. í Ikea) og auðvitað reyna að brjóta það sem minnst saman svo að ekkert krumpist.
Þegar kemur að förðunarvörum, setjið alla brúsa sem eru líklegir til að leka í plastpoka. Það er alls ekki skemmtilegt að byrja fríið á ónýtum fötum löðrandi í sjampói. Takið með aukapoka fyrir heimferðina. Allar glerumbúðir ættu að vera vel einangraðar, í poka og vafið inní fatnað eða annað mjúkt. Sniðugt er að kaupa litlar tómar túpur og flöskur og fylla á þær úr stórum umbúðum. Þannig tekur maður einungis með sér það sem maður þarf.
Það er mjög mikilvægt að troða ekki í töskuna þar sem það fer illa með hana og hættan á að hún hreinlega ‘springi’ er alltaf til staðar. Það fer heldur ekkert vel með fatnaðinn að vera ofþjappaður saman, hann verður að fá loft til að halda forminu. Ekki pakka heldur of lítið í töskuna, pakkið þá frekar í minni tösku til að forðast of mikla hreyfingu. Einnig er gott að taka alltaf upp úr töskunni um leið og komið er á áfangastað. Það er svo miklu þægilegra að sjá föt og skó á hengjum og hillum en í krumpi ofan í tösku.

Ferðafötin
Þá eru það ferðafötin sjálf, hverju á að klæðast í flugvélinni. Flestir hugsa um þægindi en þægindi þýðir ekki jogginggalli. Sem betur fer eru flestir vel til hafðir í flugum og þannig á það líka að vera þar sem mikið úrval er af fallegum fatnaði í þægilegum efnum. Verið viðbúin veðurbreytingum. Þegar er farið er frá kulda hér á landi til hitabeltiseyju þarf maður að vera klár. Þótt veðurbreytingarnar séu ekki alltaf svo dramatískar, veit maður aldrei við hverju má búast. Þjappaðar flugstöðvar virðast alltaf bera heitt andrúmsloft og inní vélinni er alltaf annað hvort of heitt eða of kalt. Þarna er lagskipting (e. layering) aðalmálið. Að kunna að klæða sig þannig að hægt sé að taka nokkrar flíkur af í hita og fara svo aftur í þær þegar það verður kaldara. Þung kápa er nánast aldrei til góðs. Hlý, þykk peysa og léttur jakki yfir er betri kostur, því það er leiðinlegt að burðast með stóra kápu. Best er að geyma skartið þangað til komið er á áfangastað. Stórir eyrnalokkar eru fyrir manni þegar reynt er að sofna og safn af armböndum, hálsmenum og hringjum gerir fólk í röðinni við öryggishliðið pirrað þegar kemur að því að taka allt af. Háir hælar gera ekkert nema þreyta og meiða fæturnar – flatbotna er viðeigandi hér.

Nauðsynjar í handfarangurinn:
Rúm handtaska   Til að rúma allan handfarangur er best að vera með stóra handtösku.
Seðlaveski   Þægilega stórt til að halda farmiðana, gjaldeyri og jafnvel vegabréfið.
Tímarit & bækur   Það vill engum leyðast í löngu flugi. Verum tilbúin með afþreyingarefni ef flugvélabíómyndin bregst.
iPod   Hafið iPodinn hlaðinn og tilbúinn með öllum uppáhaldslögunum. Gerið mismunandi lista, t.d. með þægilegum lögum meðan maður leggur sig og svo hressilegri lögum.
Mjúkt teppi   Ekki treysta á að nóg sé af teppum í flugvélinni. Þunnt en hlýtt teppi í hentugri stærð þarf ekki að taka mikið pláss, en víð og hlý golla virkar líka vel.
Hlýjir sokkar   Ef þú ert í opnum skóm og engum sokkum er gott að fara í sokka ef það verður kalt í fluginu.
Lyf   Verkjatöflur og önnur nauðsynleg lyf ættu alltaf að vera með í handfarangri.
Rakakrem & varasalva   Þegar þurrt og súrefnislaust loft hefur áhrif á húðina.
Tannbursta/Mintur   Eitthvað til að fríska andardráttinn, hvort sem það er tannbursti, mintur eða tyggjó.
Mini förðunarsett   Til að fríska aðeins upp á útlitið áður en farið er frá borði.

Stjörnurnar á flugvöllum

Boho trendið endalausa

Bohemian trendið hefur verið vinsælt síðustu ár og í hvert skipti sem það virðist vera á leiðinni ’út’, tekur það á sig nýja stefnu. Árið 2005 var 'boho-chic' uppgötvað að nýju af stjörnum eins og Sienna Miller og Kate Moss, þar sem hippalegar samsetningar voru í aðalhlutverki. Boho stíllinn hefur farið í gegnum ýmsar breytingar síðustu ár og nú er talað um nýjan boho straum, það er búið að blanda lúxus og alþjóðlegum áhrifum við hann og útkoman er skemmtileg blanda af ríkmannlegum efnum og litum en sama kæruleysislega lúkkinu.

Þessi mynd af boho stílnum kom fyrst fram á sjónarsviðið í sýningu Balenciaga fyrir síðasta haust, þar sem ýmis þjóðleg áhrif blönduðust óvenjulega saman við tæknilegan skófatnað. Þjóðlegu áhrifin spönnuðu allt frá austur evrópskum þjóðarútsaum til ikat munstra. Sýningin vakti gríðarlega lukku og án efa ein af áhrífaríkustu sýningum vetursins 2007-8. Það hvernig munstrum var blandað saman á þægilegan máta, fatnaðurinn var hippalegur en með lúxus touchi – til að mynda voru palestínu klútar skreyttir með gulltjulli.

Í sumarsýningunum voru það hönnuðir á borð við Matthew Williamson sem endurgerðu boho strauminn. Nú bættust við ombre munsturtækni og komu litir skemmtilega út þegar þeim var dýft í aðra. Sumarlúkkið var aðeins tónað niður, þar sem lög af fatnaði og aukahlutum henta ekki eins vel í heitu mánuðunum. Metaláhrifin voru samt á sínum stað til að gefa glys í hippastílinn. Veronica Etro hélt einnig bohemian stílnum í sinni sýningu, en hún fékk innblástur úr litum og munstrum íbúa Tíbet og Indlands. Hún notaðist einnig við minjagripi frá Mexíkó og hugsaði línuna útfrá lífi heimamanna. Roberto Cavalli var undir áhrifum frá Afríku við gerð Just Cavalli línunnar, hvort sem það voru skreytingar á fatnaðinum eða munstur.

Fyrir næsta haust var svo munsturkóngur tískuheimsins til staðar með flott munstur sem tóku á sig tæknilega hlið, en það er aftur hinn eini sanni boho hönnuður Matthew Williamson sem hannar einnig undir merki Emilio Pucci. Það var allt svolítið sett á hærri stall, glamúrinn meiri, munstrin sterkari og áhrifaríkari og meiri tæknileg atriði. Lögin hafa minnkað og það er frekar áhersla á eitt munstur með nóg af aukahlutum.

Eins og sjá má eru hönnuðir undir áhrifum mismunandi heimsálfa til að fá svolítið alþjóðlegt og marglita útlit. En til að ná lúxus-alþjóðlega-boho straumnum, skal blanda saman sterkum litum, munstrum með vott af gulli, metalglingri og kæruleysi. Bætið dökkdumbrauðum nöglum við fyrir aukið drama. Þetta er ekki eins auðvelt og hið gamla boho útlit, heldur krefst þetta meiri fyrirhöfn, en útkoman er líka ólýsanlega flott og ófyrirsjáanleg.

Punkturinn yfir i-ið

Klassískur klæðnaður og óspennandi basic litir geta oft á tíðum orðið leiðindagjarnt. Þegar ekkert er spennandi við klæðnað og athyglin ekki á neinn ákveðin stað, er kominn tími til að poppa hann upp með áhugaverðum litum, áferðum og smáatriðum.

Litir

Litir eru einfaldasta leiðin til að draga athygli að einhverju og gera svartan klæðnað miklu áhugaverðari. Sterkir litir í djúpum tónum virka best. Einnig falleg munstur með blöndu af litum, en þá ætti frekar að halda sig við færri litatóna heldur en fleiri. Fallegar blússur í léttum efnum eins og chiffon ganga vel undir svartan jakka, svo eru gollur í litum alltaf smart. Sterkir litir henta best þegar þeir fá að njóta sín innan um svartan, hvítan eða gráan og góð regla er að klæðast ekki fleiri en þremur litum í einu, sérsaklega ef þeir eru allir áberandi. Þeir sem eru minna fyrir liti geta reynt að birta yfir fötunum með aukahlutum eins og skóm, klútum, töskum eða varalit.

Áferð

Svart frá toppi til táar þarf ekkert að vera bannað. Það þarf ekkert alltaf að vera dull og sýna vott af hugmyndaleysi og litafælni. Langt í frá getur svartur verið virkilega flottur þegar ólíkar áferðir eru paraðar saman. Þá er ég að tala um leður við kvenleg og flögrandi efni; mjúkt, fínt prjónaefni við háglans lakkskó; og silki við mattara efni. Þegar leikið er með áferðir þarf að passa að tvær er oftast nóg, sérstaklega ef leður er annað þeirra.

Smáatriði

Eitthvað sem tekið er eftir. Eitthvað lítið sem dregur augað að. Það getur verið fallegir skartgripir, öðruvísi tvist á klassískari samsetningu eða skemmtilegt snið. Það að hugsa aðeins út fyrir rammann getur oft veitt skemmtilega útkomu. Að nota öðruvísi aukahluti og spá í sniðum. T.d. að draga inn mittið á ýkt víðum kjól með fínlegu belti og skapa þannig miklar andstæður. Eða nota eitthvað á annan hátt sem maður hefði ekki getað séð fyrir.

Hönnuðurinn Miuccia Prada

Miuccia Prada hefur að mínu mati eina áhugaverðustu ferilsögu hönnuðar. Ástæðan fyrir því, er að hún er ekki ein af þessum hönnuðum sem ‘hafa haft áhuga á hönnun síðan þeir fæddust’ og ‘byrjuðu að sauma þegar þeir voru fimm ára’ og þar fram eftir götunum. Að vissu leyti fékk hún starfið eilítið upp í hendurnar þar sem hún var arftaki krúnu Prada fyrirtækisins, en það virðist aldrei hafa verið ætlun hennar að verða heimsfrægur hönnuður.

Hún er ítölsk, fædd í sjálfri tískuborginni Mílanó árið 1949. Hún er yngsta barnabarn stofnanda Prada, Mario Prada. Hún, ásamt eiginmanni sínum Patrizio Bertelli, tók við fjölskyldufyrirtækinu árið 1978 af móður sinni. Þau hjónin hafa átt mikinn þátt í stækkun fyrirtækisins og juku úrvalið með því að koma fyrst með ready-to-wear línu og þar á eftir ódýrari línuna Miu Miu, sem hefur ekki síður átt við mikla velgengni að fagna. Fyrirtækið selur lúxusvörur um allan heim, er virði margra milljarðra og hjónin hafa þ.a.l verið á lista Forbes yfir ríkasta fólk heims.

Miuccia er hámenntuð, með doktorsgráðu í stjórnmálafræði, hefur lært látbragðsleik og er mikill listaunnandi. Hún hefur því ekki lært tískuhönnun í listaskóla, en það kemur alls ekki niður á hönnuninni. Hún hefur unnið til verðlauna fyrir fallega og hreina hönnun, gæðaefni og frábær handbrögð. Hún hefur þó sagt að velgenginni eigi hún að mörgu leyti eiginmanni sínum að þakka, sem hún hitti rétt áður en hún tók við fyrirtækinu og hefur staðið á bak við hana öll þessi ár. Hann á mikinn þátt í útrás fyrirtækisins á alþjóðamarkaði og inniheldur þetta valdahús nú merki á borð við Fendi, Helmut Lang og Jil Sander.

Miuccia er trú sínum skoðunum og hugmyndum og er það eitt af því sem hefur gert hana einn leiðandi hönnuð heims. Hún eltir ekki, heldur fer sínar leiðir. Hún hélt því alltaf fram að tískuheimurinn væri heimskur og að það væri til gáfaðri og hógværari greinar, en hún hefur nú afsannað það því tíska er listform. Þótt tíska sé yfirborðskennd og tískuheimurinn geti verið grimmur, þá er hún einnig eitthvað sem er fallegt fyrir augað, eins og málverk eða skúlptúr. Eins og hún segir sjálf: "Það sem þú klæðist er hvernig þú sýnir heiminum þig, sérstaklega í nútímaheimi þar sem mannleg samskipti eru svo snögg. Tíska er tungumál augnabliksins."

 

Tískan í Sex and the City

Sex and the City þættirnir hafa óneitanlega haft mikil áhrif á líf kvenna um allan heim og þeirra sjálfsmynd, en tískuáhrifin hafa samt ekki vakið minni athygli. Nú þegar myndin kemur út er náttúrulega enn meira gert úr tískuhliðinni og þar aftur fengin tískudrottning þáttanna, stílistinn Patricia Field, til að klæða vinkonurnar. Sarah Jessica, sem leikur Carrie aðalpersónuna, segir að tískan sé öðruvísi og er það skiljanlegt þar sem persónurnar hafa þroskast og stíllinn breytist með tímanum.

Snilld Patriciu liggur í skilning hennar á persónunum. Það er erfitt starf að skilja karakter hverrar persónu fyrir sig og túlka persónuleika þeirra með fötum. En hún nær því einhvern veginn svo frábærlega að það er erfitt að hugsa hvernig hlutirnir væru ef annar stílisti ætti í hlut. Hún sýnir að persónuleiki er það mikilvægasta þegar föt og tíska eru annars vegar. Hún túlkar hverja persónu á sinn hátt og nær að skila ákveðnum draumaheimi til áhorfenda.

Aðferðir Patriciu er ekki að klæða þær í hönnunarföt beint af sýningarpöllunum. Það væri of einfalt. Hún reynir að opna hugmyndir fyrir öðru eins og vintage fatnaði og antík aukahlutum, og blanda með því dýra og flotta. Þannig nær hún að skapa skemmtilegri klæðnað. Auk þess hefur hún einstaka sýn á föt og er snillingur í að koma með eitthvað óvenjulegt og óvænt – eitthvað sem maður hefði ekki getað hugsað sér.

Í þáttunum, þurftu konurnar aldrei afsökun fyrir því að dressa sig upp. Þær gerðu það einfaldlega af því þeim langaði til þess. Þær voru ekki að reyna að þóknast gildum annarra. Aðalpersónan Carrie Bradshaw, hefur algjörlega sinn eigin stíl og er ekki klædd í tískustrauma. Það er eitthvað dreymandi við fatnað hennar – fjaðrir, pífur, loðfeldir. Hún klæðir sig í það sem hún vill, þegar hún vill. Skóárátta hennar er einnig áberandi út þættina og var merkilegt að sjá tilfinninganæmi hennar þegar skór áttu í hlut – grátur, hlátur og hvaðeina. En ætli tískan sé ekki bara valdamikil og nauðsynleg, eins og sagt er; "A girl needs her shoes".

Carrie: Er óhrædd við tískuna. Ekki hægt að lýsa stílnum með einu orði. Er mikið fyrir hönnuði en blandar fötum oft óvenjulega saman. Skór spila stóra rullu sem og aukahlutir.
Samantha: Fatnaður hennar er kynþokkafullur og skín af sjálfsöryggi. Hún sýnir kvenlegar línur í aðþröngum og áberandi fatnaði. Litir, munstur og glys eru hennar einkennismerki.
Charlotte: Hefur sætan, dömulegan stíl sem ber með sér svolítinn snobbfíling. Hún er alltaf vel til höfð með tilheyrandi útvíðum kjólum og fínum sniðum.
Miranda: Vinnufatnaður hennar samanstendur af drögtum, skyrtum og pencil pilsum. Hreinir litir og beinar, skarpar línur. Klæðnaður hennar í frítíma er þó kvenlegri og meira um liti og þægilegri snið.

 Myndband sem sýnir tískuna í myndinni. Viðtal við Pat Field:

Tískumóment í gegnum tíðina í þáttunum

Áhrif Sex and the City

Það verður Sex and the City þema á blogginu þessa vikuna, í tilefni af frumsýningu myndarinnar á föstudaginn. Þetta verður svipað og í þarsíðustu viku þar sem það var persónulegs stíls þema og mun ég gera þetta öðruhverju, tileinka einhverju ákveðnu efni eina og eina viku. En þeir sem eru ekki aðdáendur Sex and the City (vonandi enginn) verða því að afsaka það að næstu greinar verða tengdar þáttunum.

Það er ekki hægt að neita áhrifum Sex and the City þáttanna. Áhrifin birtust í hinu ýmsu myndum en fyrst og fremst fjölluðu þættirnir um sjálfstæðar og opnar konur sem voru ekki hræddar við að vera þær sjálfar og segja það sem þær hugsuðu. Það sem hefur kannski orðið hvað vinsælast við þættina er hvað konur geta tengst mikið persónunum og þeirra vandamálum. Umfjöllunarefnin eru ást með tilheyrandi samböndum, vinskap, skemmtanalífi og fjölskyldu.

Það er alveg ljóst að það er ekki hægt að bera neinn þátt saman við Sex and the City. Þættirnir voru einsdæmi á sínu sviði og það mun örugglega ekki koma neitt svipað sem nær jafnmiklum vinsældum á næstu árum. Þátturinn gaf konum einhverja von og aðra sýn á lífið; það er í lagi að vera einhleyp; það er í lagi að kaupa dýra skó; það er í lagi að vera með manni sem er fátækari en þú; það er í lagi að langa ekki að eignast börn; og það er mannlegt að gera mistök.

Vinsældirnar aukast dag frá degi og gera það enn í dag þótt ganga þáttanna hafi hætt. En þeir byrjuðu árið 1998 og fylgdu vinkonunum Carrie (sem segir sögu vinkvennana), Charlotte, Miröndu og Samönthu, með fallegum mönnum inná milli. Þessar konur buðu áhorfendum inní veröld New York borgar og sýndu hvernig líf nútímakonunnar er. Beinskeyttur húmor og völd kvennanna spila þar stóran sess. Það er ekki verið að fegra neitt heldur eru hlutirnir látnir vera raunverulegir og eins og þeir eru.

Nú þegar myndin kemur út, fjórum árum eftir þættina, er augljóst að þættirnir sitja enn í fólki og það hefur ekki gleymt vinkonunum fjórum. Margir eru orðnir virkilega spenntir að sjá myndina sem verður frumsýnd á föstudaginn hér á landi. Ég hef nú þegar nælt mér í miða og hvet ég alla harða aðdáendur til að fara inná midi.is og tryggja sér miða á frumsýninguna.

Fín Tilefni

Eitt það erfiðasta við fínni tilefni er að finna út hvað á klæðast hvenær og við hvað. Það ættu ekki að vera ákveðnar reglur, þar sem maður á fyrst og fremst að klæðast því sem maður er ánægður í, en það er samt alltaf gott að huga svolítið að tilefninu. Það er óþægilegt að mæta bæði of fínn og ófínn. Þess vegna er gott að skoða boðskortið (ef það er) og leita eftir upplýsingum um klæðnað. Oftast er hægt að geta sér um stig klæðnaðsins útfrá því sem er að gerast, en ef maður er ekki viss er alltaf best að hringja í gestgjafann eða skipuleggjanda og spyrjast fyrir. Bara til að hafa allt á hreinu.

Galaboð (Black Tie)

Síðkjóll er algengastur við þessi tilefni, þótt það sé ekkert möst. Hvort sem þetta er árshátíð eða fínt stórafmæli er þetta tilefni til að hafa fyrir útlitinu og kjóllinn ætti að vera mjög fínn. Boð af þessu tagi býður upp á tilefni til að láta dekra aðeins við sig og fara í greiðslu og förðun, eyða pening í fallegan kjól – eða klæðast plain svörtum kjól og láta athyglina vera á fallegt skart og skó.

Kokkteilboð

Þessi eru ekki eins fín og galaboð en krefjast samt að þú klæðist annaðhvort kjól eða einhverju öðru fínu eins og pilsi. Hér má aðeins leika sér með liti og munstur. Þar sem kjóllinn er frekar stuttur, allt frá rétt fyrir neðan hné og rétt fyrir ofan hné, er best að skórnir séu háir og svolítið flottari en plain svartir. Skartgripir mega vera áberandi á borð við kokkteilhringi og fína eyrnalokka. Taskan ætti alls ekki að vera stór, og þar sem oftast hentar ekki að vera með tösku á öxlunum í svona boðum, er clutch taska passleg.

Brúðkaup

Fyrst af öllu skaltu forðast að klæðast hvítu. Ég er í raun ekki sammála þessu, en fólk verður stundum mjög tilfinningasamt með það. Það er því best að halda sig frá hvítu til að draga sem minnsta athygli frá brúðinni. Einnig er allt sem er of háð tísku og trendum frekar óviðeigandi, best að sleppa himinháum skóm og of mikið af skarti. Hér þarf að skoða boðskortið vel. Er þetta fín kvöldveisla (sem myndi þýða klæðnað á borð við kokkteilboð eða jafnvel galaboð), er þetta sólrík sumarveisla (fallegur, léttur sumarkjóll), eða sveitabrúðkaup undir berum himni (hér myndi millifínn klæðnaður hæfa).

Millifín tilefni

Sum tilefni kalla á klæðnað sem má hvorki vera of fínn en heldur ekki of casual. Mataboð, lítil afmælisveisla eða annað tilefni sem kallar á eitthvað milli gallabuxna og kjóls. Þá þarf að fara milliveginn og það er ýmislegt í boði þar. Pils virka vel, ef það er vídd í því er aðsniðin toppur betri en ef það er í þrengra laginu hentar frjálsegt efni betur að ofan. Svartar jakkafatabuxur við smart blússu er einnig flott, jakkinn er í raun óþarfur. Gallabuxur geta alveg gengið, en þá er líka best að þær séu frekar klassískar og í dökkum lit. Eins og flestir vita hentar nánast hvað sem er við gallabuxur þannig að það er ekkert endilega eitthvað eitt betra en annað þar. Kjóll er alveg inní myndinni, en vertu viss um að tóna hann niður og passa að sniðið sé frekar örlítið vítt heldur en hitt. Hrár leðurjakki virkar vel við ef kjóllinn er aðeins of fínn, eða casual golla.
Í raun er best að hugsa þetta þannig að þú villt vera fínni en þú ert vanalega og eyða smá tíma í undirbúning en ekki uppstríluð í förðun og hári með glitrandi skart og allann pakkann.

Þemapartý

Það eru til nokkrar útgáfur af þemapartýum. Það er til hið klassíska grímuball þar sem gestir mega líklegast velja búning að eigin vali og ef til vill er það örlítið í frjálslegri kantinum; svo eru það þemapartý með ýmsum þemum og þau geta verið misfín. Fyrir fínni boð ættirðu að halda þig við kvenlegri hlutverk. Það þarf að gefa góða hugsun í þemað og reyna að gera sitt besta í að túlka það. Annað er einungis móðgun fyrir gestgjafa sem er af öllum líkindum búin að hafa fyrir öllu saman. Þegar vikið er að frjálslegri boðum má alveg fara aðeins út fyrir rammann, en best er þó að huga að því að þema eru oft túlkuð best með aukahlutum, förðun og öðrum smáatriðum. Fyrirferðamiklir búningar minna aðeins á öskudaginn.

Allt kjólar frá ShopBop

10 Klassískar Flíkur

Klassískar flíkur sem eru áreiðanlegur er eitthvað sem allir ættu að eiga í fataskápnum. Hugsaðu þær sem beinagrindina og svo byggirðu í kringum hana. Það er ekkert gaman við klæðnað sem er það klassískur að hann verður leiðinlegur, það er að segja þegar fólk klæðist engu öðru en öruggum valkostum. Það er hinsvegar nauðsynlegt að eiga grunnhlutina til að geta klæðst með því sem er eftirtektarvert. Klassískar flíkur eru eitthvað sem standa af sér tískustrauma og árafjölda. Þær ganga frá degi til kvölds, milli árstíða og í hvaða heimshluta sem er.

Casual

1. Stuttermabolir: Persónulega finns mér V-hálsmen klassískara, en U-laga er einnig í lagi svo lengi sem það er í fallegum boga. Gott er að eiga boli í nokkrum stærðum, þ.e.a.s. bæði passlega stóra og svo aðeins víðari og einnig í nokkrum litum. Sjálf held ég mig við svartan, hvítan og gráan þar sem þeir passa við nánast allt. En svo er hægt að bæta við litum eftir árstíðum og litatrendum hverju sinni.

2. Einfaldar gollur: Prjónapeysur úr mjög fínu efni eða gollur eiga flestir í skápnum. Þær er hægt að fá í allmörgum útgáfum, allt frá stuttum og aðsniðnum til víðra sniða í svokölluðu ‘afa-sniði’. Það sem er best við gollur er hvað hægt er að nota þær við ólík tilefni. Þær virka vel við gallabuxur á casual degi, við vinnufatnað og svo sem ‘cover up’ við kjóla. Þess vegna er best að eiga nokkra liti og útgáfur. Það er algjör óþarfi að eyða miklum peningum í gollur en þar sem fjöldaframleitt fínt prjónaefni getur hnökrað, er best að borga aðeins meira fyrir allavega eina til að nota fínt.

3. Gallabuxur: Klassískt par af gallabuxum sem henta þínum vexti fullkomlega. Til að þær gangi sem lengst er dökkt óþvegið efni best. Það er ekkert endilega eitt snið betra en annað, það er svo misjafnt hvað klæðir hverjum og einum, en mjög útvíðar skálmar og níðþröngar buxur ætti að varast þegar maður leitar að klassísku pari. Ef gallabuxur eru eitt af þínum uppáhaldsflíkum og þú ert ekki nýjungagjörn í þeim efnum, er best að kaupa tvennar þegar þú finnur hið fullkomna par. Margar verslunarkeðjur framleiða hinar bestu gallabuxur, en það ætti þó alltaf að pæla í gæði efnisins.

4. Dagkjólar: Kjólar í þægilegum efnum, sem virka kannski í vinnu en ekkert fínna en það. Við erum að tala um mjúk efni og basic liti eins og svartan og gráan. Það eru ýmis snið sem geta verið klassísk, en ‘shift’ kjólarnir eru hentugastir. Þeir eru beinir í sniðinu og ná allt frá miðjum lærum til hnjáa í sídd. Þeir geta verið stutterma eða ermalausir og ættu að ganga óháð árstíð.

Fínni tilefni

5. Svartur kjóll: Orðið ‘Little Black Dress’ (LBD) kannast flestir við sem lesa erlend tískutímarit, en hann er talinn vera eitthvað sem allar konur ættu að eiga í skápnum. Svartur kjóll í klassísku sniði sem alltaf er hægt að grípa í. Hann er öruggt val og virkar vel við hin ýmsu tilefni. Það besta er að þar sem kjóllinn er ekki aðalatriðið, er hægt að leika sér meira með skó, aukahluti og skart. Það segir sig sjálft að ef kjóllinn á að vera nothæfur og flottur í fleiri ár er best að gefa sér tíma í að finna hið besta snið sem hentar sínum vexti. Svo er alltaf hægt að bæta við ódýrari í öðrum útgáfum.

6. Svartar sokkabuxur: Húðlitaðar sokkabuxur ganga nánast aldrei. Þær eru einfaldlega ekki smart. Eins og allir vita hafa leggings verið vinsælur síðustu tvö ár eða svo og búið að vera mikið trend. Það er spurning hvenær sá straumur fer að dvína og hafa þær nú þegar náð sínu hámarki. Svartar sokkabuxur, hinsvegar, eru og verða alltaf klassískar. Síðasta haust sáust sokkabuxur í allskyns útgáfum og urðu mikið trend, en svartar eru samt alltaf bestar.

7. Svartar/Gráar buxur: Ganga vel sem vinnufatnaður, en einnig í fínni tilefni og þá með kvenlegri blússu, hugsanlega í fallegum lit. Þröng snið eru ekki klassísk og heldur ekki mjög víðar. Millivegurinn er bestur þar sem sniðið er örlítið vítt en þær eru samt passlegar á mjöðmunum.

8. Blazer jakki: Klassískur blazer jakki er svartur, þótt hann komi alltaf í fleiri litum hvert ár er það svartur sem heldur sér í tímans tönn. Hann virkar við gallabuxur, við svartar buxur sem dragt, við kjóla og pils. Sem sagt við nánast allt.

9. Hvít skyrta: Mun alltaf vera klassísk. Hún skal vera svolítið innblásin af karlmannsniði, til að vera sem tímalausust, en samt halda kvenleika og þynþokka.

10. Trench kápa: Þessi tegund af kápu hefur verið dýrkuð í meira en 70 ár af bæði konum og körlum. Hún er algjörlega tímalaus og hentar nánast hvaða vexti sem er. Þótt hún sé klassísk skortir hana ekki fágun og glamúr. Hinn klassíski litur á trench kápum, beige, er að mínu mati flottastur.

Hvað aukahluti varðar, finnst mér ekki endilega einhverjir einir klassískari en aðrir. Það er náttúrulega alltaf svarta taskan sem er passlega stór til að geyma allt nauðsynlegt – og ónauðsynlegt. Flatbotna ballerínuskór og plain svartir háhæla skór eru einnig eign sem flestir ættu að eiga. Það segir sig samt sjálft hvað aukahlutatíska breytist hratt, að aukahlutir á borð við skó og töskur er það sem meirihluta stórra tískuhúsa er að fá inn helstu tekjurnar. Fólk einfaldlega kaupir sér miklu oftar nýjar töskur, skó og skart til að krydda fatnaðinn.

Athugið að þetta er einungis viðmiðun og hugmyndir. Það fer eftir atvinnu, lífstíl og stíl hvað þú álítur vera klassískar flíkur.

Stílistar & Stíll Stjarnanna

Til eru tvær tegundir af stílistum; persónulegur stílisti og tískustílisti. Það eru hinn fyrrnefndi hópur sem ég mun fjalla um að þessu sinni. Eins og nafnið bendir til einbeita þessar gerðir stílista sér að því að aðstoða og veita sína þjónustu til einstaklinga. Þeir hjálpa fólki við innkaup á tískuvörum, samsetningu og jafnvel endurskipulagningu fataskápsins til að auðvelda vinnuna við að klæða sig.

Þegar maður hugsar um tískuvarning og auðæfi, leggur saman tvo og tvo, þá gæti maður svo sem alveg ímyndað sér að það væri ekki svo erfitt starf að stílisera sig sjálfur. Ef fólk á á annað borð peningana til að kaupa fullt af dýrum fatnaði sem á að vera það nýjasta og ‘í tísku’ ætti viðkomandi þ.a.l. að líta vel út. En eins og flestir vita geta peningar keypt tísku en ekki stíl. Nema maður sé ríkur. Þá kaupa peningar stílista.

Margar stjörnur sem viðurkenna ekki að nota þjónustu stílista, gera það í raun og veru. Samkvæmt heimildum vel þekkts stjörnustílista treysta u.þ.b. 95 % af helstu Hollywood-stjörnum á stílista. Það eru jafnvel oft kvikmyndaver, sjónvarpsstöðvar og umboðsskrifstofur tónlistarmanna sem taka við reikningum, sem getur verið $5000 dollarar á dag, eða um 400.000 krónur.

Þótt flestar stjörnur kalli einungis til stílista þegar stærri viðburðir liggja fyrir, hafa margar nú orðið stílista reiðubúna allan ársins hring. Þá dressa þeir viðskiptavininn ekki einungis upp fyrir rauða dregilinn heldur einnig fyrir hin daglegu störf og útréttingar. Þá sér hann að mestu eða alfarið um fatainnkaup, tekur fataskápinn í gegn mánaðarlega eða eftir árstíðum og stjarnan sjálf gerir ekkert nema kannski að taka lokaákvarðanir. Þannig næst þegar þú sérð einhverja stjörnuna líta óaðfinnanlega út við matarinnkaupin og hugsar með þér hvað hún hafi nú flottan stíl, eru miklar líkur á að hún hafi fengið hjálp við verkið. Stjörnustílistinn Rob Zangardi segist stanslaust vera að versla og fá lánuð föt fyrir sína kúnna svo þeir eigi alltaf eitthvað til að fara í, hann sýnir þeim svo bestu samsetningarnar svo þær þurfi ekki að hringja í hann áður en þær fara út úr húsi.

Þótt hver stílisti hafi sinn persónulega stíl felast hæfileikar þeirra í því að vinna með líkamsvöxt og lífstíl hvers viðskiptavinar fyrir sig. Þeir þurfa að kunna að fara eftir því hvað stjarnan hefur upp á að bjóða. Þannig er ákveðinn prósess þegar ný stjarna kemur í verk stílista, að móta stílinn og ákveða hvaða leið á að fara. Nicole Chavez sem sér m.a. um stíl Kristen Bell og Rachel Bilson segist nota stílinn sem stjarnan hefur fyrir og betrumbæta hann svo. Hver og einn hefur sinn persónuleika og það er það sem hún reynir að ná fram. Þar sem stjörnurnar eru myndaðar oft af paparazzi ljósmyndum geta þær ekki klæðst sama hlutnum oft og því sýni hún kúnnum sínum leið til að endurtaka hluti á öðruvísi hátt. Stílisti Natalie Portman og Michelle Williams skoðar vel tískuna og tískusýningar til að geta frætt þær um nýjustu trendin. Fyrir stærstu viðburðina eins og Óskarinn, þegar stjörnurnar prýða draumkenndir síðkjólar, hugsar hún útlitið svolítið eins og hún væri að stílisera tískumyndatöku – hún býr til ákveðna mynd og fantasíu í höfðinu af því sem hún vill að útkoman verði.

Ég hef valið 9 frægar konur sem að mínu mati hafa mjög flottan stíl – hvort sem þær hafa stílista eða ekki. Það eru náttúrulega alveg helling af vel klæddum frægum konum en mér finnst þessar standa úr, bæði hvað varðar stíl á rauða dreglinum, sem og í casual fatnaði í daglegu lífi. Ég hef ekki valið ungstirni á borð við Nicole Richie, Rachel Bilson, Olsen systur o.s.frv. ekki af því þær eru ekki með flottan stíl, heldur væri það of mikil upptalning og mér finnst þær svolítið elta trend. Enda myndi mig langa til að fjalla sér um hverja og eina því þær sjást oftar en ekki virkilega smart og hægt að fá góðar hugmyndir frá mörgum af þeim. Þær sem ég hef valið eru allt frá aldrinum 25 til 43 ára og ég valdi frekar þær sem eru eldri þar sem meiri líkur á að þær hafi sett sér sinn stíl og sín trademark.

 

 

Ráð til að gera stílinn persónulegri

Það getur verið erfitt að gera stílinn sinn persónulegan þegar maður er undir áhrifum frá svipuðum fjölmiðlum, verslar fjöldaframleiddar flíkur og hefur kannski ekki hugrekki til að sýna sinn eigin stíl. Ég ætla því að gefa nokkur góð ráð, bæði hvernig sé best að fá innblástur, en einnig hvernig sé best að versla í verslunarkeðjum en persónugera stílinn í leiðinni.

Innblástur

- Fyrir það fyrsta, þá er nauðsynlegt til að ætla að hafa sinn eigin stíl, að skoða stílinn hjá öðrum. Fá innblástur frá fólkinu á götunni. Hægt er að fara inn á sérstakar götustíls bloggsíður, þar sem venjulegt fólk sem ljósmyndari telur hafa góðan stíl er myndað. Góðar síður er t.d. frá Stokkhólmi, New York og London.

- Fyrir þá sem hafa mikinn áhuga á tísku er sniðugt að skoða sumar- og haustlínur hönnuða á netinu. Sýningar fyrir sumar næsta árs eru í september/október og sýningar fyrir komandi vetur eru í febrúar/mars. Góðar síður eru Style.com og Elle.com. Hægt er að fá góðar hugmyndir frá hönnuðunum og einnig hefur maður betri sens fyrir komandi trendum.

- Ríka og fræga fólkið hafa góðan aðgang að hönnunarmerkjum og tískusýningum og því oftast með puttan á púlsinum hvað tískuna varðar. Ef stjarnan sjálf hefur ekki nógu mikið tískuvit, er mjög líklegt að hún hafi stílista í vinnu. Hægt er að fá góðar hugmyndir frá fræga fólkinu, ekki endilega bara í sínu fínasta pússi á rauða dreglinum, heldur einnig dagsdaglega og þá geta stjörnubloggsíður komið að góðum notum.

- Fyrir þá sem hafa tíma og áhuga getur verið gott að rífa úr tímaritum myndir af því sem gæti veitt manni innblástur. Hægt er að hagræða því saman í svokallað ‘moodboard’, og skipta reglulega út myndum. Hönnuðir nota þessa aðferð til að skilgreina innblástur sinn fyrir nýja línu, en þetta er einnig góð aðferð til að sjá hverju maður er að leitast eftir í sínum eigin persónulega stíl.

- Ef allt það nýjasta og ferskasta bregst, getur verið gott að fá innblástur úr gömlum bíómyndum sem skarta kvikmyndastjörnum fyrri tíma á borð við Audrey Hepburn, Grace Kelly og Brigitte Bardot. Annað sem tengist ekki tísku en hefur samt ómetanleg áhrif á hana er tónlist. Allt frá tónlistarfólki á borð við Madonnu til Nirvana. Ef það er eitthvað annað sem hægt er að fá innblástur frá eru það önnur lönd og aðrir menningarheimar. Að fylgjast með hvernig fólk klæðist í mismunandi löndum og borgum er nauðsynlegt til að fá annan sens á hlutina. Hvort sem þú tekur það með þér heim eða ekki.

Verslanir

- Mjög gott er að vera búin að skoða hverju maður er að leita af. Þó skal varast að hugsa of mikið um tískustrauma, þeir geta oft verið skammlífir og eina og sama trendið virkar ekki alltaf fyrir alla líkamsvexti.

- Á hálfsárs til árs fresti er gott að fara í gegnum fataskápinn, þá helst áður en maður verslar sumar og vetrarfötin, hverju má henda, hvað á að geyma og hvað vantar.

- Besti tíminn til að versla er fyrir hádegi, en bæði er minnst að gera þá og einnig er fatnaðurinn vel raðaður og aðgengilegur. Þannig er meira næði, minna fólk, starfsfólkið frekar reiðubúið að aðstoða og fötin ekki í hrúgum eða liggjandi á gólfinu. Mestu örtraðirnar eru um helgar, þannig að ef ekki gefst tími til að fara í verslunarleiðangur fyrir hádegi á virkum dögum, virkar seinni parturinn alveg eins ágætlega.

- Flestar stærri verslunarkeðjur fá nýjar sendingar vikulega (stundum nokkrum sinnum í viku). Því er gott að spyrjast fyrir um í sínum uppáhalds verslunum hvenær nýjar sendingar koma inn, þá er hægt að tryggja sér það besta strax. Í vinsælum verslunum er gott rennsli á vörum, þannig ef maður sér eitthvað er oftast best að næla sér í það þá og þar. Taktu líka vel eftir því þegar stórar keðjur fá línur sem koma í fáum eintökum, þá eru minni líkur á að hitta einhvern í eins. Vertu viss um að skoða gæðin og ekki kaupa hluti bara af því þeir eru ódýrir. Þótt oft sé hægt að fá góð kaup á útsölum, er þar oft einungis að finna restar sem enginn hefur viljað.

- Í minni hönnunarverslunum koma sendingarnar ekki eins oft, en samt getur verið gott að hafa á hreinu hvenær stærstu sendingarnar og sumar/vetrarlínurnar koma. Þar sem minna rennsli er á vörum í þessum verslunum er hægt að koma oftar til að skoða og hugsa sig um áður en fjárfest er í dýrri flík. Einnig er gott ráð að grennslast fyrir um helstu merki og hönnuði og skoða línurnar á netinu áður en þær koma í verslunina, til að fá fíling fyrir hverju má búast. Stundum getur verið gott að vingast við starfsfólkið þannig það geti látið mann vita hvenær nýjar vörur koma.

Í klukkuátt úr efri röð frá vinstri: Götustílssíður gefa góðar hugmyndir úr raunveruleikanum / Gamlar kvikmyndir sem prýða kvikmyndastjörnur á borð við Audrey Hepburn er góður innblástur / Besti tíminn fyrir verslanaleiðangur er fyrir hádegi á virkum dögum / Nauðsynlegt er að endurskipuleggja fataskápinn reglulega / Í hönnunarverslunum fær maður persónulegri þjónustu og þar sem vanalega er minna rennsli á vörum er hægt að taka sér meiri tíma í að ákveða sig áður en maður fjárfestir í dýrri flík / Að skoða stjörnurnar í casual dagklæðnaði gefur góðan innblástur / Aðrir menningarheimar geta oft gefið hugmyndir og látið mann prófa óvenjulega hluti / Hljómsveitin Nirvana er talin hafa byrjað hið vinsæla 'grunge' trend.